on holiday by mistake: september 2008

Madonna sin regidebut.... bra?

Det er blanda kjensler eg sit att med etter å ha sett traileren til Madonna sin regidebut Filth and Wisdom.

På den eine handa står Madonna for alt som er gale med verda (eg vel å ikkje utbrodere), på den andre sida ser dette ut som ein film... eg kjem til å lika. Herleg sigøynerpop, frekke ballerinatøs, lettfeldig omgong med prostitusjon, store bartar, Richard E. Grant i ei birolle - kva er det ikkje å bli entusiastisk av ved dette?

Filth and Wisdom byrja som eit kortfilmprosjekt, og berre balla på seg, til Madonna stod med ein 80-minuttar lang indiefilm mellom hendene, som Screendaily kallar "no better or worse than the averahe creaky low-budget Britfilck", som, med tanke på at den gjennomsnittelege lågbudsjetts Britflick eigentleg er ganske bra, er utruleg nok gode skussmål(!). Eg kjem framleis ikkje over at eg har positive forventningar til denne filmen. Etter at eg har skrive dette kjem eg til å gå i dusjen og synge "The Crying Game" medan eg skrubbar meg sjølv til blods. Men på den andre sida, dersom Madonna har suksess med dette prosjektet kan det jo hende at ho legg den grufulle musikkarierra si på hylla og konsenterer seg om å lage film om mannlege sigøynarprostituerte på heiltid, og eg trur vi alle kan vere fint einige om at det hadde vore for det beste. Kanskje vi til og med greier å gløyma "Die Another Day" - tittelsporet som øydelagde karriera til Pierce Brosnan.

Her er uansett taileren, via Slashfilm.

Etiketter: Sniktitt, Snål film

Paul Newman 1925-2008

Ei av verdas absolutt største filmstjerner - og då snakkar vi om den typen skodespelarar som verkeleg har rett til å kalle seg stjerner, har gått bort etter sin kamp mot kreft.

Ei uttalelse frå Newmanfamilien lyd, “His death was as private and discreet as the way he had lived his life.”

I tillegg til å vere kjend frå seminale verk som Butch Cassidy & The Sundance Kid, Katt på hett blikktak, Cool Hand Luke, Inferno i flammer, Stikket, og sist men ikkje minst introdusert til ein ny generasjon som Doc Hudson i Biler, var Newman også ein forkjempar for økologisk mat, og stod bak det økologiske varemerket Newman's Own, som gav alt overskot til veldedigheit.

Eit stort tap for filmverda; Newman var ein utruleg dyktig skodespelar, og ei klippe av ein mann.

WTFIT: Evil Dead: The Musical 3D til det store lerretet?

Før helga vart det bekrefta at Sam Raimi og Tobey Maguire har signert for Spider-Man 4 og 5. Ikkje så store nyhende at vi følte for å skrive om det her (sidan Spider-Man 3 bestod av fire ulike typar FAIL).

Dette førte naturlegvis til at fansen nok ein gong følte seg snytt for Evil Dead 4, etter at Raimi hinta frampå at han var i planleggingsfasen med eit nytt manus, og at Brucaren ville vende attende til den "karriereskapande" rolla som Ash, under San Diego Comic Con i år (kvifor skreiv eg ikkje om det, seier du? Alle ekte fans veit aldri kjem til å skje uansett!).'

Men no ser det på ein måte lysare ut for dei som krever meir Evil Dead: Raimi har tilsynelatande gått med på at gjengen bak den overraskande suksessfulle Evil Dead: The Musical får retten til å dra ein The Producers - filmatisering av musikalen - i 3D! Screen Daily rapporterer at Raimi er i samtalar med dei om prosjektet.

Musikalregissøren Christopher Bond og koreograf Hinton Battle ynskjar å ta fatt på innspelinga til våren, med castet frå den originale oppsetjinga, men har ein del rettigheitsklarering å gjere før dei er i gong, og planlegg altså filmen i 3D.

Kva meir kan ein seie, enn dette (som eg trur eg har posta før!):

(via Slashfilm)

Etiketter: bruce-o-rama, Ryktebørs, Vås

Ph'nglui mglw'nafh Hastur Blogspot wgah'nagl fhtagn

Den gudfryktige manns Dom DeLuise, kjendisbloggaren Hastur (i feriefotoet til venstre, der han poserer villig vekk utanfor den mytiske byen R'Lyeh), har flytta husvære frå det tvilsame og tilsynelatande fascistiske nettsamfunnet EnjoyDiary (ED), og slått seg ned her på Blogspot. No vert han å finne under tittelen Profeten Hastur,og kjem til å halde fram med å blogge om ulumske styggedomar som nazistar, Ayn Rand, og Vladimir Putin, lett ispedd nerdeting som film, teikneseriar, spel, og popkultur.

For dei som er interessert i nøyaktig kvifor skjeggemannen vart ekskommunikert, les hjå ein av deira eigne brukarar, før også han vert utestengd frå nettsamfunnet - eine og aleine for å setje spørsmålsteikn ved metodane nettsamfunnet tek i bruk for å få bukt med denne irriterande ytringfridomen.

Vi har mast på fyren for å få han ut av den bula av tenåringsangst i fleire år, og ynskjar han velkomen hit, så lenge han hugsar kven det var som gav han tilnamnet "Mad Mullah" (det finst fotobevis, og luchadormasker var involvert). Rekn med gjesteinnlegg frå Hastur her seinare på hausten, når det nærmar seg filmfestival.

Huttetuane attende til start

Coming Soon (via Slashfilm) rapporterer i dag at Spike Jonze-filmatiseringa av Where the Wild Things Are ("I huttetuenes land") endeleg er på sporet att. Internasjonale distributørar har lenge hatt filmen på "kjem snart"-status, men no er altså ein dato klar: 16. Oktober 2009. De hugsar kanskje at filmen fekk sleppedato 20. Oktober '09 ein gong i Februar, og at dette førde til stor ståhei, då mange (meg inkludert) hevda det tyda på at Warners ville endra retninga i Jonze sitt heller skumle og filosofiske verk (les meir om dette her), og omforme filmen meir mot mindre barn, og ikkje nostalgiske vaksne og hipsters slik Jonze & co. retta seg mot. Men så vart filmen tilsynelatande ført, bakbunden og blindebukk, inn i Development Hell, heilt til WB no altså har gjeve filmen attende den (tilnærma) originale datoen.

Men dette er likevel enormt gode nyhende (filmen kjem i alle fall ut!), og om de ikkje har lese mine tidlegare postar på dette emnet og er like overtydd om kor fabelaktig denne filmen blir som eg, ja då bør de skamme dykk.

Etiketter: Huttetu, Popkult

Ghostbusters 3 i pre-produksjon

I følgje Variety er Columbia Pictures endeleg klar for å lage eit etterlengta tredje kapittel av Ghostbusters.

Det er produsentane av den amerikanske versjonen av "The Office", Lee Eisenberg og Gene Stupnitsky som har fått jobben med å koke i hop eit brukbart manus med det originale castet. Kvifor Harold Ramis og Dan Aykroyd ikkje skal skrive manuset sjølv, er uvisst. Det virkar litt rart å ikkje stole på suksessformelen - dei to skreiv båe føregåande installasjonar, og Ghostbusters var Columbia sin største kassasuksess ever før Men in Black og Spider-Man. Dei to nye manusforfattarane har samarbeidd med Ramis før på Jack Black/Michael Cera-komedien Year One, som kjem ut til neste år, så det kan bli ein god indikasjon på korleis dette samarbeidet vil gå.

Alt ligg vel an til å bli gull, så lenge dei held seg borte frå den noko ukjende originale Ghost Busters, ein tv-serie frå 1975:

Eller er det eigentleg dette vi treng ein remake av...?

(via io9)

Del Toro har tydelegvis ikkje tenkt å ta ut noko avspasering med det fyrste

Guillermo Del Toro står som kjend for filmatiseringa av Hobbiten for Peter Jackson, men no har det kome for ein dag at han også skal lage nye versjonar av Universal Pictures' klassiske skrekkfilmar Doctor Jekyll & Mr. Hyde og Frankenstein. Saman med Dracula stod desse filmane for ryggraden i Universal sitt skrekkabinett på 30-talet, og det var desse filmane som redefinerte karakterane til slik vi kjenner dei i dag (Boris Karloff-Frankenstein-monsteret med boltar i halsen, til dømes).

I tillegg skal han óg filmatisere Kurt Vonnegut-romanen Slaughterhouse Five, ein roman som også har vore filmatisert før, med heller labert resultat.

Alt dette skal altså gjennomførast medan draumeprosjektet hans, Into the Mountains of Madness, filmatiseringa av H.P. Lovecraft si novelle ved same namn (som, lat oss være ærlege, er det vi alle eigentleg ventar på) lét venta på seg. Det er rett og slett irriterande at mannen tek på seg så mykje på bekostning av Mountains, men så er det nettopp for å få lov til å lage Mountains at han tek på seg desse typiske prestisjeprosjekta, så vi får berre sukke, sette oss godt til rette, og vente nokre år til.

For øvrig: Er det berre meg som tykkjer Del Toro kanskje ikkje er riktig mann for å filmatisere... Vonnegut?

(Eigentleg skreiv eg berre denne posten for å få med sistnevnte, for å reklamere for Absalong sitt H.P. Lovecraft-foredrag 15. September, som du kan lese meir om her.

Og, ja, for å slenge ved denne Youtube-videoen av komikar Frank Caliendo. Den er relevant, æresord!)

Etiketter: cthulhumania, Popkult, Ryktebørs, Vås

Don LaFontaine, 1940-2008

Alle trailerstemmers mor, Don LaFontaine, gjekk diverre bort i går, etter komplikasjonar med pneumotoraks, eller lungekollaps.

Don vart eit popkulturelt megaikon som følge av hans unike bidrag til filmhistoria - trailerstemma. Han byrja meir eller mindre direkte som "the voice of Paramount" i 1978 (etter å ha opparbeidd seg ein sterk CV i filmindustrien som m.a. studiomiksar, klippar og produsent), og sementerte seg som kongen av voiceovers over dei neste 25 åra. Du har garantert høyrd stemma hans på tallause trailarar, som Terminator 2, Cast Away, og sågar kanskje 24 og Arrested Development. Don var ein mann med utruleg god sjølvironi, og lo gjerne av at andre vitsa på sin bekostning, som Pablo Fransisco sin klassike stand-up rutine, Previews Guy:

For ikkje å snakka om korleis det blir når alle dei kjende trailerstemmene slår seg saman!:

Om du framleis ikkje kjennar han att, la han introdusere seg sjølv til deg. Du skuldar han det - han har bygd opp forventningane våre til blockbusters til det ekstreme i over 30 år!

Om nokon har stemme til å tala frå grava, så er det denne mannen! (Og James Earl Jones og Christopher Lee, sjølvsagt, men dei er heldigvis framleis blant oss). Kvil i fred, Don, ingen kan lenger tvinga deg til å prøva få ein Keanu Reeves-film til å høyrast bra ut.

(via Slashfilm og MightyGodKing)

Etiketter: Popkult

Free to those that can afford it, very expensive to those that can't.

lenker:

tidlegare postar:

arkiv:

30 september, 2008

Madonna sin regidebut.... bra?

28 september, 2008

Paul Newman 1925-2008

08 september, 2008

WTFIT: Evil Dead: The Musical 3D til det store lerretet?

07 september, 2008

Ph'nglui mglw'nafh Hastur Blogspot wgah'nagl fhtagn

06 september, 2008

Huttetuane attende til start

05 september, 2008

Ghostbusters 3 i pre-produksjon

Del Toro har tydelegvis ikkje tenkt å ta ut noko avspasering med det fyrste

02 september, 2008

Don LaFontaine, 1940-2008