on holiday by mistake: Til huttetuenes land (oppdatert)

Eg hadde eigentleg ikkje tenkt å skrive om bråket rundt Spike Jonze si filmatisering av den fantastiske barneboka "Til huttetuenes land" (Where The Wild Things Are, 1963) av Maurice Sendak (til norsk ved gudmora av norsk barnelitteratur, Anne Cath. Vestly) då Dagbladet plukka opp saka før meg (ikkje at dei skjøna kva det gjekk i, men det ventar vel ingen at dei skal).

Kort oppsummering av den originale saka: Eit klipp av noko som såg ut til å vere frå denne filmen dukka opp på nettet og skapa stor blest. Var det eit klipp frå sjølve filmen? Eller var det ei performancegruppe i New York som hadde laga sin tributt til filmatiseringa? Mange uttrykte misnøye med den uferdige utsjånaden, spesielt lyden, men dei aller fleste skjøna at om det var eit faktisk utdrag frå filmen, var det tale om eit uferdig testklipp, ikkje eit stykke av den ferdige versjonen. Det meldast hovudsakleg om positive tilbakemeldingar, og Spike Jonze gav ut ei pressemelding der han forklarar at dette er eit veldig tidleg testklipp som ikkje ein gong er ein del av innspelinga, men noko dei gjorde for å prøve ut teknologien og dei Jim Henson Creature Shop-designa kostyma monstra figurerer med.

Men så lakk det ut meir informasjon: Warner Bros., dette ugudelege (og udugelege!) syndens konglomerat, er ikkje nøgd med den tidlege (og fortfarande uferdige) versjonen (IKKJE relatert til klippet, om de følgjer) av filmen som vart vist for eit testpublikum seint i fjor. Filmen er for mørk, for vaksen, for komplisert. Dette er akkurat slikt me ventar WB skal sei (naturleg nok forstår dei ikkje handlinga sjølve), men kvifor har dei då hyra indie-filmkongen Jonze til regi, generasjon X-forfattaren Dave Eggers til manus, og Karen O frå Yeah Yeah Yeahs til å lage filmmusikk? Venta dei ein ukomplisert Disney-film frå denne gjengen?

Deltakarar på testvisninga fortel at representantar frå WB velde møysommeleg ut kven av dei frammøtte som skulle fylle ut eit vurderingsskjema, og valde kategorisk bort alle som kjende Jonze, Eggers og Karen O sine respektive arbeide.

Fans argumenterer at sidan det var Generasjon X som vaks opp på denne boka, burde det i utgongspunktet vere dei som var nøkkelgruppa, men WB er nok for redd for å marknadsføre ein 70-millionars affære til ei så snever gruppe (det skjønar vi óg).

For å sitere Cinnemaniac1979 som såg filmen og kommenterte om det hjå Slahfilm: "Historia handlar ikkje så mykje om å hugse korleis det var å vere barn, som om sjølve realiteten ved å vere eit barn. Småguten Max innbiller seg inn i ei verd befolka av monstre, Dei ville, og deira forhald til ein annan er parallellar til Max eigne forhald til familie og venar. Monstra er store og skumle - ikkje fordi dei er dumme, men fordi dei gjer ting utan å tenkje over det - inkludert ting som kan gjere vondt - slik ekte barn gjer." Høyrest dette ut som noko med Eddie Murphy? Eller som noko som passar godt med ein mørkare tone og arthaus regi?

Men dette er ikkje alt i denne saka. I dag kom ordet over vatnet at WB er så lite nøgde med han vetle gutungen som spelar hovudrolla (i tillegg til misnøye med effektene) at dei vurderer å kreve at filmen vert fullstendig redesigna og spelt inn om att. Dobbel-yikes!
Ei total omattinnspeling ville i alle fall vere katastrofalt: Dei ville mest sannsynleg miste trioen Jonze/Eggers/O, og ville ha kasta 75 mill. ut vindauget.

Typisk WB å skulde på ein liten gut og nokre skarve effekter i staden for å innrømme at dei ikkje skjøna noko av filmen. Gud forby at publikum skulle måtte tenkje seg fram til noko når dei ser film.

De kan lese meir hjå Chud, og me skal følgja med vidare på denne saka.

~~... For ordensskuld: Her er det omtala klippet. Ser det ikkje fabelaktig ut?~~
Warners har fått klippet fjerna både herfra, frå Slashfilm og Youtube. Vi vel å ikkje fiske fram ein ny kopi nett no.

Kjelder: Chud, Slashfilm, IO9

Redigert for staveleif, noko omformulert, og gjeven ny tittel

Etiketter: Huttetu, Popkult